ప్రపంచతెలుగు మహా సభల సందర్భంగా పది మనవులు

అధికార భాషా సంఘం అధ్యక్షులు గౌరవనీయులు
శ్రీ మండలి బుద్ధ ప్రసాద్ గారికి నమస్కారం

తెలుగు భాష అభివృద్ధి కోసం నిరంతరం పరితపించే నాయకునిగా తమరికున్న పేరు అందరికీ తెలిసిందే గనుక భాషాభివృద్ధి కోసం ఏం చెయ్యాలో మరొకరు మీకు చెప్పవలసిన పనిలేదు.అయినా ప్రపంచ తెలుగు మహా సభల సందర్భంగా నామదిలో మెదిలిన కోరికలను పరిశీలనార్ధమై తమ దృష్టికి తీసుకు వస్తున్నాను.
1. మన రాష్ట్రంలో తెలుగు మొదటి అధికార భాష కాగా ఉర్దూ రెండవ అధికార భాష. ఈ రెండు భాషల ప్రజల మధ్య వారివారి భాషా పదాల పరిచయం, అవ గాహన, మరింత పెరగటానికి నిఘంటువులు ఎంతగానో తోడ్పడతాయి.ఉర్దూ- తెలుగు నిఘంటువు, ఉర్దూ-తెలుగు జాతీయాలు, తెలుగు-ఉర్దూ సామెతలు లాంటి పుస్తకాలు ఎక్కడా అమ్మకానికి దొరకడం లేదు.ముద్రించాల్సిన అవసరం ఉంది.1938-మొదటి ఉర్దూ - తెలుగు నిఘంటువు 1938లో వరంగల్ ఉస్మానియా కాలేజిలో అరబిక్ మాజీ ప్రొఫెసర్ శ్రీ ఐ.కొండలరావు సంకలనపరచి ప్రచురించారు.మొత్తం 857 పేజీల పుస్తకం.పునర్ముద్రణ చేయాటానికి అంగీకరించిన తెలుగు అధికార భాషా సంఘం అధ్యక్షుడు ప్రసాద్ గారికి దీనిని 6.10.2008 న అందజేశాను.2009 ఏప్రిల్ 25 వ తేదీన ఉర్దూ తెలుగు నిఘంటువు పునర్ముద్రించి అధికార భాషా సంఘం అధ్యక్షుడు ఏబికెప్రసాద్ గారు విడుదల చేశారు.ఇప్పుడు ముషాయిరాల కంటే ముఖ్యమైన తెలుగు-ఉర్దూ నిఘంటువు కావాలి. కొండలరావు గారిదే తెలుగు-ఉర్దూ నిఘంటువు ఉందని సామల సదాశివ గారు నాతో చెప్పారు.1300 పేజీల ఈ నిఘంటువు తన దగ్గర కూడా ఉందనీ,పునర్ముద్రణకోసం ఇస్తానని ఖుతుబుద్దీన్ (ఫోన్.9703771012) గారు చెప్పారు. 1906 లో తిమ్మారెడ్డి గారు రాసిన తెలుగు-తెలుగు-ఉర్దూ శబ్దార్ధచింతామణి 213 పేజీలుంది.మొత్తం తెలుగు లిపిలోనే ఉంది. http://archive.org/details/sabdarthacintama00unknsher.ఏదో ఒక సంస్థ ద్వారా ఈ చిన్ని పుస్తకాన్ని ముద్రింపజేస్తే బాగుంటుంది.

2. నాగార్జున వెన్న , కొలిచాల సురేశ్ లాంటివారు http://eemaata.com/font2unicode/index.php5 లతో తెలుగుకు అద్భుతమైన సేవ చేశారు.వెన్న నాగార్జున గారు (vnagarjuna@gmail.com) యూనికోడేతర ఫాంట్లన్నిటినీ యూనీకోడ్‌కి మార్చేలాగా పద్మ ఫాంటు మారక ఉపకరణం తయారుచేశారు. పద్మ అన్ని భారతీయ భాషల్లోనూ కలిపి దాదాపు 80 ఫాంట్లను యూనీకోడ్‌కి మార్చగల సామర్ధ్యానికి ఎదిగింది.http://padma.mozdev.org/. కొన్ని అను ఫాంట్ల సమస్య కొలిచాల సురేశ్‌ (suresh.kolichala@gmail.com) గారివల్ల తీరింది. 2009లో అను నుండి యూనికోడ్‌ లోకి మార్చే ఒక మారకానికి anurahamthulla version అని నా పేరు కూడా పెట్టారు. శ్రీకృష్ణదేవరాయ,పెద్దన,తిమ్మన,తెనాలిరామకృష్ణ,సూరన్న,రామరాజ,మల్లన్న,ధూర్జటి,రామభద్ర,గిడుగు,గురజాడ,సురవరం, యన్.టి.ఆర్.,మండలి,నాట్స్, పొన్నాల,రవిప్రకాష్,లక్కిరెడ్డి అనే 18 అక్షరరూపాలను విడుదల చేశారు.సంతోషం . కానీ ఇప్పటికే అనూ ,సూరి,లాంటి యూనీ కోడేతర ఫాంట్లలో ముద్రితమై ఉన్న విస్తారమైన తెలుగు సాహిత్యాన్ని తెలుగు యూనీకోడు లోకి మార్చే మార్పిడి సాధనాలు కావాలి. తర్జుమా పరికరాల తయారీ ప్రారంభదశలో ఉంది గనుక కొన్ని తప్పులు వస్తున్నాయి.అనువాద ఉపకరణాలు, నిఘంటువులు, లెక్కకు మిక్కిలిగా రావాలి. ఆన్‌లైన్‌లోనూ ఆఫ్‌లైన్‌లోనూ వాటిని విరివిగా లెక్సికన్లు వాడుకునే సౌలభ్యాలు కలగాలి. వాటిని తయారు చేసే సాంకేతిక నిపుణులకు నిధులు ఇవ్వాలి , ప్రతి యేటా తెలుగు వైతాళికుల పేరు మీద ప్రోత్సాహక బహుమతులు ఇవ్వాలి.

3. తెలుగు మీడియంలో కంప్యూటర్‌ చదువులు కూడా రావాలి. అలా చదివిన డిగ్రీ విద్యార్థులకు పోటీ పరీక్షల్లో ప్రోత్సాహకాలు ప్రకటిస్తే తెలుగు చాలాకాలం బ్రతుకుతుంది.యంత్రానువాదాలకూ, లిప్యంతరీకరణకూ, విషయాలకు ఆకారాది సూచికలను తయారు చేయటానికీ, వెతకటానికి అనుకూలంగా తెలుగులో కంప్యూటర్‌ వాడకం పెరగాలి. గ్రూప్‌ 1, గ్రూప్‌ 2 సర్వీసు ఉద్యోగాలలో డిగ్రీ తెలుగు మీడియంలో చదివిన వారికి గతంలో ఇచ్చిన మాదిరే 5% ప్రోత్సాహక మార్కులు ఇస్తే, తెలుగులో కార్యాలయ వ్యవహారాలు నడిపే వాళ్ళు రంగప్రవేశం చేస్తారు. కొంతవరకైనా ఆఫీసుల్లో తెలుగు బ్రతుకుతుంది. తెలుగు విూడియంలో చదివితే ఉద్యోగా లొస్తాయన్న ఆశతో కొంత మందైనా తెలుగులో చదువుతారు. తెలుగులో చదివిన అధికారులు కార్యాలయాల్లో జరిగే పనులన్నిటికీ ''కొత్తపదాలు'' పుట్టిస్తారు. తెలుగు పదకోశాలు అమలవుతాయి. పరిపాలనకు పనికొచ్చే శాస్త్రీయ తెలుగు తయారవుతుంది. అధికార భాషగా తెలుగును అమలు చేయాలనే పట్టుదల, ఆకాంక్ష ఉంటే తెలుగు మాధ్యమంలో చదివిన విద్యార్థుల్ని ప్రోత్సహించి అధికారులుగా చేయాలి.

4 . సజీవ వాహిని నిర్వాహకులు తెలుగు భాషలో గొప్ప సాంకేతిక పరిజ్ఞానాన్ని వినియోగించి పరిశుద్ధ గ్రంథాన్ని ఎవరికి వారే వెతుక్కునేలా మంచి వెబ్‌సైట్‌ రూపొందించారు.తెలుగు భగవద్గీతకు గానీ, తెలుగు కేతలిక్‌ బైబిల్‌కు గానీ, తెలుగు ఖురాన్‌కు గానీ ఇప్పటి వరకు ఇలాంటి సదుపాయం లేదు.http://sajeevavahini.com/telugubible అందరూ చూడదగినది. ఇలాంటి సాఫ్ట్‌వేర్‌ మిగతా తెలుగు పుస్తకాలకు కూడా లభించేలా కృషి చేస్తే విషయాల పరిశీలన సులభం అవుతుంది. తెలుగు భాష శక్తివంతం కావాలంటే తెలుగులో వెలువడిన అనేక ముఖ్య గ్రంథాలకు ఇలాంటి సాఫ్ట్‌వేర్‌ ఎంతో అవసరం. కాలంతో పాటు మనం కూడా మారాలి. తెలుగులో తయారైన పి.డి.యఫ్‌. ఫైలును కూడా నేరుగా యూనీకోడ్‌ లోకి మార్చగలిగే స్థాయి రావాలి.

5 . రాష్ట్ర అధికార బాషా సంఘం మాజీ అధ్యక్షుడు ఏబికె ప్రసాద్‌గారు ప్రభుత్వానికి కొన్ని మంచి సిఫారుసులు చేసారు. (ఈనాడు: 19-5-2005).అందులో ఈనాటికీ అమలు కానివి: 1) తెలుగు మీడియంలో చదివిన వారికి మాత్రమే ప్రభుత్వ ఉద్యోగాల్లో ప్రాధాన్యం ఇవ్వాలి. 2) ప్రైవేటు, కార్పోరేట్‌ పాఠశాలల్లో కూడా అన్ని స్థాయిల్లో పదో తరగతి వరకు తెలుగు మీడియం ఉండాలి. 3) వ్యాపార సంస్థలు, దుకాణాలన్నీ తెలుగులో బోర్డులు ఏర్పాటు చేయకపోతే వాటి లైసెన్సులు రద్దు చేసే అధికారం కన్నడ అధికార భాషా సంఘానికి ఉన్నట్లుగా, తెలుగు అధికార భాషా సంఘానికి కూడా ఉండాలి.4 ) తమిళనాడులో తెలుగు మాట్లాడే వాళ్ళు రెండవ స్థానంలో ఉన్నందున ఆ రాష్ట్రంలో తెలుగును రెండవ అధికార భాషగా ప్రకటించాలి. 5 ) రాజ్యాంగంతో సహా కేంద్ర, రాష్ట్ర ప్రభుత్వాల చట్టాలను వాడుక బాషలోకి తేవాలి. 6 ) ఎనిమిదో షెడ్యూల్డ్‌లో పేర్కొన్న బాషలన్నిటినీ అప్పటికప్పుడు తర్జుమా చేసే విధంగా పార్లమెంటులో ఏర్పాటు చేయాలి. 7 ) స్థానిక న్యాయస్థానంలో తీర్పులు అధికార భాషలో ఉండేలా చర్యలు తీసుకోవాలి. 8 ) మండల స్థాయి నుండి సచివాలయం వరకు అధికార భాషను అమలు చెయ్యని అధికారులపై చర్యలు తీసుకునే అధికారం అధికార భాషా సంఘానికి ఇవ్వాలి.ప్రపంచ తెలుగు మహా సభలలో ఈ డిమాండ్లను పునరుద్ఘాటించాలి.



6. తెలుగు భాషా రక్షణ అభివృద్ధికై మంత్రిత్వ శాఖను ఏర్పాటు చేయాలి. తెలుగులో ఉత్తర ప్రత్యుత్తరాలు రాయగల ఐ.ఎ.యస్‌. ఐ.పి.యస్‌ అధికారుల్ని, గవర్నర్లును మాత్రమే మన రాష్ట్రంలో నియమించేలా కేంద్రాన్ని కోరాలి.తెలుగు విశ్వవిద్యాలయం, అధికార భాషా సంఘం, తెలుగు అకాడవిూ, అన్ని విశ్వవిద్యాలయాల్లోని తెలుగు విభాగాలు కలసికట్టుగా కృషిచేసి ఏయేటికాయేడు అవి తెలుగు భాషాభివృద్ధి కోసం ఏంచేశాయో, ఏం సాధించాయో ప్రగతి నివేదికలను తెలుగు ప్రజలకు బయటపెట్టాలి. ఈ సంస్థలన్నీ ప్రజల నుండి సూచనలు తీసుకోవాలి. పరిపాలక గ్రంథాలు అంటే కోడ్లు, మాన్యువల్‌లు, లాంటివన్నీ తెలుగులో ప్రచురించి అన్ని కార్యాలయాలకు పంపాలి. సర్వీస్‌కవిూషన్‌ పోటీ పరీక్షలు, శాఖాపరమైన పరీక్షలు తెలుగులో నిర్వహించాలి. కూడిక, తీసివేత లాంటి తెలుగు పదాలకు బదులు సంకలనం, వ్యవకలనం లాంటి సంస్కృత పదాలను వాడి తెలుగు మీడియం అంటే పిల్లలు భయపడేలా చేశారు. పిల్లల పుస్తకాలు వాడుక తెలుగుతో చెయ్యాలి. .కేవలం తెలుగు మీడియంలో మాత్రమే చదివిన వాడికి ఇంగ్లీషురాక పోయినా ఎటువంటి శాస్త్ర సాంకేతిక రంగంలో నయినా ఉద్యోగం గ్యారంటీగా వస్తుందనే వాతావరణం కల్పించాలి. అంటే ఇంగ్లీషు రాకపోయినా కలెక్టరు , డాక్టరు , ఇంజనీరు కాగలిగే విధంగా మన విద్యా వ్యవస్థ మారాలి! అప్పుడు జనం తండోపతండాలుగా తెలుగులో చదువుతారు.



7 . తెలుగు జాతికి గుర్తింపు, మనలో ఎన్నో కులాలు మతాలు ఉన్నాయి. అవి మనల్ని విడదీస్తున్నాయి. ఈ భాష మనల్ని కలుపుతుంది. ఈ భాష మాట్టాడేవాళ్ళ సంఖ్యనుబట్టి, జనబలాన్ని బట్టి పార్లమెంటులో మన గౌరవం మనకు దక్కుతుంది. హిందీతో పాటు తెలుగును కూడా ఇతర భాషలవాళ్ళు నేర్చుకోవాల్సి వస్తుంది.పార్లమెంటులో హిందీ వాళ్ళలాగా మనం కూడా తెలుగులో మాట్లాడవచ్చు. కేంద్ర ప్రభుత్వం జారీచేసే ఉత్తర్వులన్నీ తెలుగులో పొందవచ్చు. కేంద్రంతో ఉత్తర ప్రత్యుత్తరా లన్నీ తెలుగులో నడుపవచ్చు. చట్టాలన్నీ తెలుగులోకి మార్చబడతాయి. తెలుగులో తీర్పులొస్తాయి. తెలుగులో ఇచ్చే అర్జీలు ఢిల్లీలో కూడా చెల్లుతాయి. ఇతర రాష్ల్రాల్లో ఉన్న తెలుగువారికి కొండంత అండ, గౌరవం హిందీ వాళ్ళతో పాటు సమానంగా లభిస్తాయి. దేశవ్యాప్తంగా కేంద్ర ప్రభుత్వ కార్యాలయాలు, రైల్వేస్టేషన్లలో బోర్డుల విూద తెలుగులో కూడా పేర్లు రాస్తారు. ఈ రోజున హిందీ భాష వల్ల హిందీ వాళ్ళకు ఏయే ప్రయోజనాలు ఒనగూడాయో అవన్నీ తెలుగు వాళ్ళు పొందవచ్చు.ప్రపంచ తెలుగు మహా సభల్లో తెలుగును రెండవ జాతీయ భాషగా ప్రకటించాలని తీర్మానం చెయ్యాలి.

8 . ఏ జాతి సమస్త వ్యవహారాలు ఆ జాతి మాతృ భాషలోనే జరుగుతాయో ఆ జాతి సుఖపడుతుంది. అది ఎప్పటికీ విజేతగానే ఉంటుంది. మన రాష్ట్రంలో తెలుగు మాతృభాషగల 'తెలుగు ముస్లిములు' లక్షలలో వున్నారు. నిత్యం ఉర్దూ మాట్లాడే ముస్లింలలో కూడా పలువురికి ఉర్దూ చదవడం, రాయడం రాదు. వీరంతా తెలుగులోనే రాతకోతలు సాగిస్తుంటారు. ఉర్దూ రాని ముస్లింలకు కూడ వివాహ ధృవీకరణ (నిఖానామా) పత్రాలను ఉర్దూలోనే జారీ చేస్తున్నారు. తెలుగు ముస్లిముల సౌలభ్యం కోసం ఖాజీలు తెలుగులోనే నిఖా ప్రసంగాలు చేస్తున్నారు. ఖురాన్‌, హదీస్‌వంటి మూల గ్రంథాలన్నిటిని తెలుగులో ముద్రించారు. అలాగే వివాహ ధృవీకరణ పత్రాలను కూడ తెలుగులో ముద్రించి ఇస్తే తెలుగులోనే పూరించి ఇస్తామని ఖాజీలు అంటున్నారు. కాబట్టి వక్ఫ్‌బోర్డు వివాహ ద్రువపత్రాలను తెలుగు భాషలో కూడా ప్రచురించాలి.

9 . ఏదైనా ఒక భాష దేవ భాష లేదా దేవతా భాష అనే అభిప్రాయం కలిగితే ఆ భాషను ఎంతో గౌరవిస్తారు. పూజ్య భావంతో మొక్కుతారు, సాగిల పడతారు. అందుకే తెలుగు భాషామతల్లిని మన పెద్దలు తెలుగుతల్లి అనే దేవతగా భావించి విగ్రహాలు ఏర్పాటు చేశారు. ‘‘మా తెలుగు తల్లికి మల్లెపూదండ ` మా కన్న తల్లికీ మంగళారతులు’’ అంటూ అడపాదడపా పూజలూ జరిపిస్తున్నారు. మనిషికి జడవని వారు కొందరు దేవుడికి భయపడతారు. దేవుడి భాష పట్ల శ్రద్ధా భక్తులు కనబరుస్తారు. తమిళనాడు గుడుల్లో తమిళ మంత్రాలు,ప్రార్థనలు కూడా చదవొచ్చు,ఈ కులం వ్యక్తి అయినా అర్చకుడు కావచ్చు.తెలుగు మంత్రాలు,ప్రార్ధనలూ మన రాష్ట్రంలో కూడా రావాలి. “ తెలుగు దేవభాషే” , LONG LIVE CLASSICAL DIVINE TELUGU అంటూ ప్రపంచ తెలుగు మహాసభలు చాటిచెప్పాలి.

10 . తెలుగు జాతీయలూ, నుడికారాలూ, పదబంధాలూ కూర్చిన నిఘంటువుల అవసరం ఉంది . ప్రపంచతెలుగుమహాసభలసందర్భంగా ఇలాంటి నిఘంటువులన్నీ కలిపి ఒకపెద్ద నిఘంటువును ప్రచురిస్తే బాగుంటుంది. http://archive.org/details/padabhamdhaparij021997mbp

ప్రాచీన భాషా పీఠం నిధులతో మహా నిఘంటువు, జాతీయాలు, సామెతలు, జానపదగీతాలు, పాత చిత్రాలలోని పాటలు మొదలైన సాహిత్య గ్రంథాలు ముద్రించాలి.1975 లో లకంసాని చక్రధరరావు, ఆంధ్రా యూనివర్శిటీ ప్రొఫెసర్‌ సంపాదకత్వంలో ‘‘తెలుగు వ్యుత్పత్తి కోశం’’ పేరుతో తెలుగు నుండి తెలుగు నిఘంటువు 1,08,330 పదాలతో 8 సంపుటాలుగా వెలువడినది.ఈ సంపుటాలను ఆన్‌లైన్‌లో పెడితే బాగుంటుంది.ఎన్ని ఎక్కువ తెలుగు నిఘంటువులు నెట్‌లో చేరితే తెలుగు అంతగా బలపడుతుంది. కాగితం, కలం రోజులు పోయాయి. ఆధునిక అవసరాలకు ధీటుగా తెలుగు భాష తయారు కావాలి. ఇంగ్లీషులో ఉన్న సౌలభ్యాలన్నీ తెలుగుకూ కల్పించాలి. పదాల శుద్ధి`యంత్రం, గుణింత, వ్యాకరణ పరిష్కారయంత్రం, సాంకేతిక నిఘంటువులు, మాండలిక నిఘంటువులు, డిజిటల్‌నిఘంటువులు, అమరకోశాలు, పదశోధనా యంత్రాలు, ఉచ్ఛారణ ` పద ప్రయోగ నిఘంటువులు, వ్యుత్పత్తి కోశాలు, లిపిబోధినిలు, సాహిత్య శోధనా పరికరాలు, పదాను క్రమణికలు... ఇలా ఎన్నో రావాల్సిన అవసరం ఉంది. ఆన్‌లైన్‌లోనే నిఘంటువులకు కొత్త పదాలను జోడిరచే అవకాశం అందరికీ ఇవ్వాలి. ఏయే ప్రాంతాల్లో ఏ పదాన్ని ఎందుకు, ఎలా వాడుతుంటారో ఆయా ప్రాంతాల ప్రజలనే చెప్పనివ్వాలి. సరిగా ఉన్నట్లు భావించిన కొత్త పదాలను ఎప్పటికప్పుడు నిఘంటువుల్లో చేరుస్తూ పోవాలి. మన నిఘంటువుల సైజు పెరగాలి. అవి జన బాహుళ్యానికి వాడకంలోకి విస్తారంగా వస్తూనే ఉండాలి.

వందనాలతో

నూర్ బాషా రహంతుల్లా

డిప్యూటీ కలక్టర్ విజయవాడ

 9948878833

ఆకురాతి శతకం – 3

ఆకురాతి శతకం – 3

వింతలు – విడ్డూరాలు

1.           మొదటి భాగములను – పదునైన దృష్టితో

       చదివి పంపినట్టి – స్పందనలకు

       బ్రతుకు ధన్యమయ్యె – శతకోటి వందనాల్

       ఆకురాతి మాట అణు బరాట !!

2.         ఒరుల బోడిచేయు – తిరువేంకటాద్రికే

       అంట కత్తిరేసి – రైన వాళ్ళె

       దొంగ కొంపలోన – దొంగలు పడ్డట్టు

       ఆకురాతి మాట అణు బరాట !!

3.         వివిధ మతములెన్ని – భువిని వర్ధిల్లినా

       మౌఢ్యమంటనట్టి – మతము లేదు

       కోతులన్నిటికిని – మూతులు వంకరే

       ఆకురాతి మాట అణు బరాట !!

4.         గుడికి ప్రక్క నుండు – గోదారిలో మున్గి

       పంది చేసె నంట – ప్రదక్షిణలు

       పాడు మూఢ భక్తి – పందికీ సోకెనా ?

       ఆకురాతి మాట అణు బరాట !!

5.         కప్ప శోభనాలు – గాడ్దెల పెళ్లిళ్లు

       జనులు చేయు పల్లె – జాతరలకు

       సంతు పుట్టు గాని – జడివాన పట్టునా ?

       ఆకురాతి మాట అణు బరాట !!

6.         మళ్ళి మళ్ళి వచ్చు – మహి సూర్య గ్రహణాలు

       గడియ వేసి యుంచు గుడికి – స్వామి

       ఊపిరుంటె బ్రతుకు – ఉప్పమ్ము కొనియైన

       ఆకురాతి మాట అణు బరాట !!

7.         ఎలుక దున్నపోతు – ఎద్దుపై గద్దపై

       ఎక్కి తిరుగు వేల్పు – డొక్కులంత

       నభ విహారులైన – సరులకు లోకువే

       ఆకురాతి మాట అణు బరాట !!

8.         వ్యయముచేసి డబ్బు – యజ్ఞాలు చేస్తిరే

       వర్షమేది యనుచు – వగతురేల

       కోపదారి మగడు – కోరినపు డొచ్చునా ?

       ఆకురాతి మాట అణు బరాట !!

9.         ప్రబలకీర్తి గొన్న – ప్రాచీన గుడులన్ని

       కాల గర్భ మందు – కలిసి పోయె

       వాటి వేల్పు లేరి – కాటికి పోయిరా ?

       ఆకురాతి మాట అణు బరాట !!

10.                 కల్తితాళి బొట్లు – కళ్యాణ మస్తుకా

       యేమి కరువు వచ్చె – స్వామి నీకు ?

       పాడి మీద డబ్బు – పరి గేరు కొన్నట్లు

       ఆకురాతి మాట అణు బరాట !!

11.                 అవని దయ్యములకు  అల్లాహ్ బెదరేను

       సైతానంటె యేసు – చచ్చి బ్రతుకు

       గ్రహణ మంటె విష్ణు – గజగజ వణకేను

       ఆకురాతి మాట అణు బరాట !!

12.                 గుడులు కొల్లలుండ – బడియాట స్థలములా ?

       యజ్ఞముల కటంచు – యాష్టపోకు

       చచ్చు మగడు ఎచ్చట – శయనిస్తె నీకేమి ?

       ఆకురాతి మాట అణు బరాట !!

13.                 కొంగ జపము చేయు – దొంగ బాబాకాళ్ళ

       వద్ద మోకరిల్లు – పెద్ద లార ?

       గుంట నక్క కెలుగు బంటి – దాసోహమా ?

       ఆకురాతి మాట అణు బరాట !!

14.                 వడ్డి కాసు లోని – వజ్రాల నగలన్ని

       కుదువ కట్లకేగి – కుదురు కొనియె

       పొంగి పొంగి పాలు – పొయ్యి పాలైనట్లు

       ఆకురాతి మాట అణు బరాట !!

15.                 అల రికార్డు డాన్సు – అశ్లీలమై దోచు

       ఖ్యాతి గొన్న చిత్ర – బూతు ముందు

       పేదవాడి భార్య – పెద్ద కేటన్నట్లు

       ఆకురాతి మాట అణు బరాట !!

16.                 బొంది తోడ స్వర్గ – మందింప గల స్వాము

       లెందరో కలరట – ఇండియాలో

       ఎయిడ్స్ వ్యాది లాగ – ఎప్పుడూ లభ్యమే

       ఆకురాతి మాట అణు బరాట !!

17.                 చిత్ర సీమ బాట – చిలిపి కన్నెల వేట

       శోభనాల తీట – జోలపాట

       మోజుతీర నేర్పు – మొగుడు పెళ్లాలాట

       ఆకురాతి మాట అణు బరాట !!

18.                 ప్రేమ కిష్టపడని పిల్లపై కసిబూని

       దాడి చేయు వాడె – దగ్ధమగును

       నిప్పుజోలికేగి – నీల్గి చచ్చిన రీతి

       ఆకురాతి మాట అణు బరాట !!

19.                 కుక్క తిరుపతేగ – గొప్ప సింహం కాదు

       కాశికేగ పంది – గజము కాదు

       శబరిమలయి కేగ – సాలభంబు సిలకౌనె

       ఆకురాతి మాట అణు బరాట !!

20.                 సమ్మె దాడులందు – సర్కారు సొమ్మందు

       రేప్ చేయుటందు – రేసులందు

       తలను దూర్చువాడు – పులివాత పడ్డట్లె

       ఆకురాతి మాట అణు బరాట !!

21.                 చంద్రయాన వేళ – శాస్త్రవేత్తలు పోయి

       గుడికి మొక్కుటెంత – గుడ్డి తనము

       గగన యానమునకు – గాడిద సాయమా ?

       ఆకురాతి మాట అణు బరాట !!

22.                 సిగ్గు విడిచినట్టి – సివిలింజనీయర్లె

       తగ్గి వాస్తువైపు – మొగ్గు చుండ్రు

       పంది బురద నొదిలి – బ్రతుక లేదన్నట్లు

       ఆకురాతి మాట అణు బరాట !!

23.                 ఆస్తికునకు వచ్చు – ఆదాయ మదియేమి ?

       నాస్తికునకు జరుగు – నష్టమేమి ?

       భక్తి భ్రమలలో స్వ – శక్తిని కోల్పోకు

       ఆకురాతి మాట అణు బరాట !!

24.                 నవగ్రహాల కేసి – భువి జీవ రాసుల

       అంట కట్టి నారు – ఆది ఋషులు

       కోళ్ళ పట్టి చికెను – కొట్ల కేసిన రీతి

       ఆకురాతి మాట అణు బరాట !!

25.                 అగ్రదేశములకు – ఆగ్రహం తెప్పించు

       ఉగ్రవాదమునకు – వూత మేల ?

       సానుభూతి క్రూర – సర్పాల మీదనా ?

       ఆకురాతి మాట అణు బరాట !!

26.                 తాము దాల్చిలబ్ది – బాముకోవచ్చుగా

       వొరుల మీద రుద్దు – దురదయేల

       రంగురాళ్ళు బ్రతుకు – రాతలు వ్రాయునా ?

       ఆకురాతి మాట అణు బరాట !!

      

27.                 మూఢనమ్మకాల్లో – మునిగిన స్త్రీ వల్ల

       భర్త చెడును బిడ్డ – భవిత చెడును

       తాను చెడ్డ కోతి – వనమెల్ల చెరచదా

       ఆకురాతి మాట అణు బరాట !!

28.                 నోరు వాయి లేని – భూరి దేవుళ్ళకు

       బూతు పులిమినారు – రోత కవులు

       దిక్కులేని శవము – కుక్కలు తిన్నట్లు

       ఆకురాతి మాట అణు బరాట !!

29.                 చక్క గుంటె నడత – సంసార కొంపలకు

       ఎట్టులంటు కొనును – ఎయిడ్స్ వ్యాది ?

       దారి యిడక కుక్క – దూరునా వంటింట

       ఆకురాతి మాట అణు బరాట !!

30.                 గడ్డి తినెడు వేళ – కండోము దాల్చని

       కాముకులకు ఎడ్స్ – గాలి సోకు

       చాప క్రింది నీరు – కాపురాలే కూలు

       ఆకురాతి మాట అణు బరాట !!

31.                 లేడి కూన మీద – రేసుకుక్కల భంగి

       కన్నె పిల్ల మీద – కాముకేళి

       తగిన దండ నుంటె – తెగియింతురా యిట్లు

       ఆకురాతి మాట అణు బరాట !!

32.                 అంటరాని తనము – అన్నింట దూరినా

       లంజి తనము కాడ – రాదు అడ్డు

              కుల మతాల దెపుడు – గుడ్డెద్దు పోకడే

       ఆకురాతి మాట అణు బరాట !!

33.                 అధిక నల్ల డబ్బు – అఙ్ఞాత భక్తుండు

       హుండి లోన వేసి – ఉడాయించు

       పిల్లివోలె మోక్ష – పీఠాన్ని కాజేయ

       ఆకురాతి మాట అణు బరాట !!

34.                 మనిషి చచ్చి పోవు – మరుజన్మకందురే

       పిండ మెవరి కోయి – పిచ్చి నాన్న ?

       కపట బాపనయ్య – కాకుల జూపెనా

       ఆకురాతి మాట అణు బరాట !!

35.                 మానవత్వమునకు – మచ్చు తునకైనట్టి

       కన్నవారి మీద – కరుణ మరచి

       మానవుండు తిరిగి – వానరుడగు చుండె

       ఆకురాతి మాట అణు బరాట !!

36.                 రాజశేఖరుణ్ణి రక్షింపుమని యేడ్చి

       కాళ్ళ వేళ్ళ బడియు – ఖంగుతిన్న

       మతము లన్నియింక – బ్రతుకుట దండుగే

       ఆకురాతి మాట అణు బరాట !!

37.                 బొజ్జ గణపతుల – నిమజ్జన వేళల్లో

       కొన్ని ప్రాణులైన – మన్ను కలయు

       తోడు లేక  పోదు – దొడ్డ పీన్గన్నట్లు

       ఆకురాతి మాట అణు బరాట !!

38.                 పరమ నిష్టలెన్నొ – పాటించు రంజాను

       ముగియగానే నడత – మొదటికొచ్చు

       రాయి గుద్దుకున్న – రబ్బరు బంతిలా

       ఆకురాతి మాట అణు బరాట !!

39.                 తనువులుండు వరకు తప్పవీ దుః ఖాలు

              తనువునే త్యజింప – మనిరి మునులు

              మూషికాలు కొంప – మూసేయమన్నట్లు

       ఆకురాతి మాట అణు బరాట !!

40.                 కాటు వేయు నాగు – కలిమినందించునా ?

       నమ్మి కొలుచు ముద్దు – గుమ్మలార

       అద్దమేల నమ్మ – అరచేతి గాజులకు

       ఆకురాతి మాట అణు బరాట !!

41.                 దొడ్డ దేవతలకు – బిడ్డల బలియిచ్చి

       నిధుల కోరుకొనెడి – అధములార

              నిధుల మూట, తల్లి – ఉదర మందున్నదా ?

       ఆకురాతి మాట అణు బరాట !!

42.                 చెట్లు చేమలెపుడు – ఛేదించు మూకకు

       వేప రాగి చెట్లు – వేల్పులయ్యె

       బాతుగుడ్లలోన పసిడి కన్గొన్నట్లు

       ఆకురాతి మాట అణు బరాట !!

43.                 ఉల్లి తల్లి కాదు – ఉంచుకున్నది, భార్య

       కాదు, భక్తి మోక్ష గామి కాదు

       నేతి బీర చూపి – నెయ్యంటె చెల్లునా ?

       ఆకురాతి మాట అణు బరాట !!

44.                 అక్రమాలకేగి – ఆస్తి పరుడై నోడు

       చిక్క కుండ పోదు – సి. బి. ఐ కి

       దొంగదైన కుక్క – దొరికి పోకుండునా ?

       ఆకురాతి మాట అణు బరాట !!

45.                 జడలు వీడిపోయె – జాకెట్లు మరుగాయె

       వంటి మీది చీర – వలస బోయె

       నాతి సిగ్గు దాగె – ఈత దుస్తుల్లోన

       ఆకురాతి మాట అణు బరాట !!

46.                 మళ్ళి పుట్టి నట్టి – “మగధీర” ( సినిమా ) తెల్పు

       మళ్ళి వత్తుమనుచు – వెళ్ళి నట్టి

       యేసు బ్రహ్మగార్ల – కేమాయె రారైరి?

       ఆకురాతి మాట అణు బరాట !!

47.                 తాళి యుండు వరకె – తరుణి కాహ్వానాలు

       తాళి తెగిన దాని – దలపరేమి ?

       తాళికున్న విలువ – తరుణికి  యివ్వరా ?

       ఆకురాతి మాట అణు బరాట !!

48.                 రేప్ చేయ నేర్పు – దోపిడీలను నేర్పు

       గెంత నేర్పు, కౌగి లింత నేర్పు

       ఇంత కంటె నేర్వ – నేముంది సినిమాల్లో

       ఆకురాతి మాట అణు బరాట !!

49.                 అంధ యుగము నాటి – ఆచారమైనట్టి

       బుడుగు వయసులోన – వడుగు లేమి ?

       వడుగు చేయ కుంటె – వచ్చు కీడేమిటో ?

       ఆకురాతి మాట అణు బరాట !!

50.                 సైన్సు యేడ్చు మూఢ – శాస్త్రజ్ఞులను గాంచి

       కోరి కోరి చేసుకున్న మగడు

       సాని వెంట పడితె – సతులేడ్చు కొన్నట్లు

       ఆకురాతి మాట అణు బరాట !!

51.                 ధరణి పడ్డనాడె – దాత రాసిండని

       భక్తి పంచజేరి – బాధపడకు

       కట్టివేయబడిన – గాడిద కైవడిన్

       ఆకురాతి మాట అణు బరాట !!

52.                 నాగరీకమైన – నైటీలు బయదిల్లి

       చీర లాగి వైచె – సిగ్గుతీయ

       పాత మొగుడి తోటి  – పండుగా యన్నట్లు ?

       ఆకురాతి మాట అణు బరాట !!

53.                 వ్రతము చేయగానె – బ్రతుకులు మారవు

       క్రతువు చూచి వర్ష – రుతువు రాదు

       మాయ మంత్రములకు – మానునా గాయాలు ?

       ఆకురాతి మాట అణు బరాట !!

54.                 సైన్సు యుగములోన – చాదస్తయుతమైన

       యేమిటీ ప్రచార – మేసుదేవ

       పాతకములు చేసి – ప్రార్ధిస్తె పోవునా

       ఆకురాతి మాట అణు బరాట !!

55.                 తనువు మీది నగలు – తాకట్టు కేగినే

       సంకటంబదేమి – వేంకటేశ ?

       ఉన్న పరువు కాస్త – ఊడ్చుకు పోయెనే

       ఆకురాతి మాట అణు బరాట !!

56.                 తేనెకార్చు చున్న – తెలిబూది రాల్చినా

       విగ్రహాలు చూపు – వింతలన్ని

       కేటుగాళ్ళు చేయు – కిటుకులే కదస్వామి

       ఆకురాతి మాట అణు బరాట !!

57.                 మదిని దైవ బక్త యొదిగి యున్నన్నాళ్ళు

       వాస్తవాల చెవుల – వాలనీదు

       దుక్కి టెడ్ల గాట – కుక్క చేరిన రీతి

       ఆకురాతి మాట అణు బరాట !!

58.                 జాతరనుచు రేగి – జగదాంబ గుడి ముందు

       త్రాగు బోతు లెగసి – మూగ ప్రాణి

       పీక కోయగానె – దూకునా వర్షాలు ?

       ఆకురాతి మాట అణు బరాట !!

59.                 తనను జేరవస్తు దారి దుర్ఘటనలో

       చచ్చినట్టి బక్త  జనుల బ్రోవ

       చేతకాని వాడు – జాతికి దేవుడా ?

       ఆకురాతి మాట అణు బరాట !!

60.                 బోరుబావు లిపుడు – నీరివ్వడం మాని

       బాలల కబళించు – బాట పట్టె

       స్కాన్ల వేట కాడ – కూనల్ బలైనట్లు

       ఆకురాతి మాట అణు బరాట !!

61.                 భక్తి పారవశ్య – ముక్తి యాత్రల్లోన

       దారి పోడవు దైవ – దర్శనాలు

       కడకు యాక్సిడెంట్లు – కైలాస టిక్కెట్లు

       ఆకురాతి మాట అణు బరాట !!

62.                 త్రాగుడులకు నాన్న – తగలేయ డబ్బంత

       వున్న అడుగు బొడుగు ఊడ్చి తెచ్చి

       అమ్మ ఆలయాల – కర్పించి కూర్చుండు

       ఆకురాతి మాట అణు బరాట !!

63.                 అల స్వమూత్ర పాన – మౌషధం బయి పోయె

       ఆవు పంచితమ్ము – అమృత మాయె

       పంది మూత్రమేల – పనికి రాదయ్యేనో ?

       ఆకురాతి మాట అణు బరాట !!

64.                 బోడి గుండు కున్ను – మోకాటి చిప్పలకు

       ముడులు పెట్టినారు – బడుగు మునులు

       నభగ్రహాలు వచ్చి – నరుల వేటాడునా

       ఆకురాతి మాట అణు బరాట !!

65.                 రుషుల బోధ లైన – రుగ్వేద పలుకైన

       పనికిరాని చెత్త – పనలు కట్టి

       పెంట కుప్ప కెత్తి – పీడ వదిలించుకో

       ఆకురాతి మాట అణు బరాట !!

66.                 సంబరంగ చేయు – సామూహ పెళ్ళిళ్ళు

       స్వావలంబనాన్ని – చంపి వేయు

       కుక్కలదుపు సేయ – ముక్కలు రాల్చేరు

       ఆకురాతి మాట అణు బరాట !!

67.                 నన్స్ పెదవి మీద – నాజూకు ముద్దిచ్చి

       పలకరింతురంట – ఫాదరీలు

       ముద్దు పెట్ట కుంటె  - ముదరదా పెను భక్తి ?

       ఆకురాతి మాట అణు బరాట !!

68.                 మతములన్ని సంకు - చిత ఙ్ఞాన పరిధికే

       గిడసబారి పోయి – ముడుచు కొనియె

       మంద బుద్ది స్త్రీలు – మడి కట్టు కున్నట్లు

       ఆకురాతి మాట అణు బరాట !!

69.                 పూర్వ జన్మ స్మృతులు – పుట్టుకొచ్చా యిపుడు

       “దలైలామ” గారి – తలపులోకి

       మృత్యువేళ చుట్టు – ముట్టు యమభటులల్లె

       ఆకురాతి మాట అణు బరాట !!

70.                 కలియుగాంత మనుచు – కడతేరు దినమంచు

       కమ్ముకొన్న ఈ పుకార్ల నెల్ల

       సొమ్ము చేసు కొనెడి సోగ్గాళ్ళ దే హవా

       ఆకురాతి మాట అణు బరాట !!

71.                 అంగడోళ్ళ మీది – దొంగాధికారులే

       ప్రభుతను పడకూల్చు – పతిత మహిళ

       దగడి పంచ జేరి – మగని చంపిన రీతి

       ఆకురాతి మాట అణు బరాట !!

72.                 హెల్త్ పాడు చేయు – కల్తీల సరుకమ్మి

       లాభ మంద జూచు – లోభులార

       సాటి కొంప కాల్చి – చలికాచు కొందురా ?

       ఆకురాతి మాట అణు బరాట !!

73.                 పేరు మోసినట్టి – పెద్ద ఆఫీసుల్లో

       కాసులుండు వాడె – కాలుమోపు

       అట మొసళ్ళ మేప – అందరి సాధ్యమా ?

       ఆకురాతి మాట అణు బరాట !!

74.                 ముష్టి డబ్బు కొరకు – మూత్ర పిండాలనే

       అమ్ము కొనుచు నుండు – అర్భకులకు

       ఓటు అమ్ముకొనుట – ఒక పెద్ద లెక్కయా ?

       ఆకురాతి మాట అణు బరాట !!

75.                 బెల్ట్ షాపులున్ను – మల్టీ పొగాకున్ను

       వేశ్య కొంపలున్ను – వేల్పులున్ను

       నరుల  పీక్కు తినెడి – చిరకాల రక్కసుల్

       ఆకురాతి మాట అణు బరాట !!

76.                 పదవి దక్కగానె – ప్రజల నొగ్గేసేటి

       నేత లెక్కువైరి – నేటి యువత

       కన్నవారి బ్రతుకు – గాలి కొదిలిన రీతి

       ఆకురాతి మాట అణు బరాట !!

77.                 భీతి లేని పదవి – జీతమా అరలక్ష

       విధుల నెపుడు నిర్వ – హించబోరు

       పగలు రేయి కూడ –పైలాభ చింతయే

       ఆకురాతి మాట అణు బరాట !!

అక్రమాలు – అవినీతి – దురలవాట్లు

78.                 పదవి కొరకు నీవు – పార్టీ ఫిరాయిస్తె

       సరసుడైన శాల్తి – సతుల మార్పు

       మగని మార్పు కోర – మగువకు తగనిదా ?

       ఆకురాతి మాట అణు బరాట !!

79.                 భర్త పోయిన వేరు – భర్త నందగవచ్చు

       భార్య పోవ తిరిగి – బడయవచ్చు

       యుండగానె భార్య – ముండల వేటేల ?

       ఆకురాతి మాట అణు బరాట !!

80.                 శ్రమను దోచుకొనుచు – చచ్చేటి పేదలకు

       దానమిచ్చువాడు  - దాతకాడు

       పెంటమీద నిలచి – సెంటలము కొన్నట్లు

       ఆకురాతి మాట అణు బరాట !!

81.                 ప్రేమ దోమయనెడి – ప్రియునికి కౌగిళ్ళ

       విందులీయబోకు – ముందుగానె

       కులికి యీసడించు – కూర కరివేప లా

       ఆకురాతి మాట అణు బరాట !!

82.                 ప్రేమ లొలుక బోయు – పెళ్లి సీమంతాల

       సందడల్లె చేస్తె – సాముహికపు

       శోభనాలు కూడ – చూచి తరించమా

       ఆకురాతి మాట అణు బరాట !!

83.                 చెరుప వేశ్య సుబ్బి – శెట్టి గుగ్గిళ్ళమ్మె

       జూదమాడి ధర్మ – జుండు చెడియె

       కామ వాంఛ తోడ – కడతేరె రావణు

       ఆకురాతి మాట అణు బరాట !!

84.                 తేలు బొమ్మచించి – తీసేసి గుట్కాలు

       నమలి మ్రింగుచున్న – నరుల కిపుడు

       కుట్టు వరకు తేళ్ళు – కుమ్మరి పురుగులే

       ఆకురాతి మాట అణు బరాట !!

85.                 దళితుడున్నతంది – తనవారి మరచుచో

       అగ్రవర్ణ మెట్ల – నుగ్రహించు ?

       తల్లి కోడి తరుమ – పిల్లి యోదార్చునా ?

       ఆకురాతి మాట అణు బరాట !!

86.                 శాఖములను తినుచు – మేకల వదలినా

       తరుగు కూరలందు – పురుగులుండు

       మానివేయహింస – మనిషికి సాద్యమా ?

       ఆకురాతి మాట అణు బరాట !!

87.                 వ్యాధి నయము చేయ – వైద్యాలయములుండ

       మాంత్రికులను చేరు – మౌఢ్యమేల ?

       గుడ్డలుతుక మురికి – గుంటే శరణ్యమా ?

       ఆకురాతి మాట అణు బరాట !!

88.                 బక్క ప్రాణులన్న – మొక్కు దేవుళ్ళన్న

       పరుల ధనములన్న – పడతులన్న

       కండ చక్కెరల్లె – కబళించు గూండాలు

       ఆకురాతి మాట అణు బరాట !!

89.                 మందు మాకు లేదు – మరలు ప్రశ్నే లేదు

       ఏడ్స్ భూత దాడి – కెదురు లేదు

       భార్య పవిట క్రింద – ప్రాణాలు దాచుకో

       ఆకురాతి మాట అణు బరాట !!

90.                 నిండు జీవితాన్ని – గుండాయి జమ్ములో

       క్షతియొనర్చు వాడు – బ్రతక లేడు

       కరచుకుక్క బ్రతుకు – దొరకు నందాకనే

       ఆకురాతి మాట అణు బరాట !!

91.                 కల్తిసార మృతులు – కళ్ల పడ్డపుడెల్ల

       కావు కావు నేడ్చు – కాకి ప్రభుత

       ఎద్దు పుండు కాకి – కెంత ముద్దాయెనో ?

       ఆకురాతి మాట అణు బరాట !!

92.                 పెట్టు జనములుండ – భిక్షాటనము పోదు

       దానములకు పేద – తన మణగదు

       ఆజ్యమందుచుండ – అగ్గి చల్లారునా ?

       ఆకురాతి మాట అణు బరాట !!

93.                 చెట్లు చేమలన్ని – చేధించి చేధించి

       పచ్చదనము నంత – పాడు చేయ

       కరగు మేఘమాల కన్నెర్ర చేయదా ?

       ఆకురాతి మాట అణు బరాట !!

94.                 రేపులున్ను ఫైట్లు – లేటెష్టు సీన్లతో

       చిత్ర సీమ కీర్తి – శిఖర మాయె

       ఆడదాని పరువు – అంగళ్ళ పాలాయె

       ఆకురాతి మాట అణు బరాట !!

95.                 కడుపు నిండ పశువు – గడ్డి తెమ్మని కోరు

       మగువ యోగ్యుడైన – మగనికోరు

       పిసిని గొట్టు వరుడు – లెసకట్నమడుగురా

       ఆకురాతి మాట అణు బరాట !!

96.                 కుల రిజర్వులెట్టి – కుల సంఘములు కట్టి

       కులము పేర పత్రికలను నడపు

       కుళ్ళు రాజకీయ – మొళ్లు మండింపదా

       ఆకురాతి మాట అణు బరాట !!

97.                 మనువు గొప్పదియని – ధన పిపాసుల యింట

       పేదకన్న తండ్రి – బిడ్డ నిస్తె

       అల కసాయి చేత –అర కోడి పడ్డట్లె

       ఆకురాతి మాట అణు బరాట !!

98.                 బడిని మాన్పియింటి – పనులు చేయంచేటి

       తండ్రి కూల్చి వేయ – తనయ బ్రతుకు

       పెల్లు యాకటి పులి – పిల్లల తిన్నట్లు

       ఆకురాతి మాట అణు బరాట !!

జాతిరత్నాలు

99.                 సత్యన్యాయ ధర్మ – సంచితం బైనట్టి

     నీతి కల్గియుండు – హేతు వాది

     హేతు వాది యెపుడు – జాతికి రత్నమే

       ఆకురాతి మాట అణు బరాట !!       

100.           అస్తి కత్వ మంత – అంధవిశ్వాసాలు

     నాస్తి కత్వమంత – వాస్తవాలు

     కాస్తమనసు నిల్చి – వాస్తవం తెలిసికో

       ఆకురాతి మాట అణు బరాట !!

101.           కావు కావుమనెడి – కాకుల రొదలోన

     కోకిలమ్మ తీపి – గొంతు పగిది

     హేతువాది పల్కు – ఎటనున్న వజ్రమే

       ఆకురాతి మాట అణు బరాట !!

102.           హేతు వాద దృష్టి – యెదగని మదిలోన

     మూఢ నమ్మకాలు – గూడు కట్టు

     శుద్ది లేని యింట – బొద్దింక లున్నట్లు

       ఆకురాతి మాట అణు బరాట !!

103.           పుట్టి పుట్టగానె – యిట్టె కబళింపంగ

     భక్తి కొలను లోన – బలసి తిరుగు

     మత మొసళ్ళ గెలుచు – మనుజులే నాస్తికుల్

       ఆకురాతి మాట అణు బరాట !!

104.           అపర శాంత మూర్తి – ఆధ్యాత్మికుండనకు

     నాస్తికునకు హింస – నైజమునకు

     ఒరువు వేయకుండ – సరకు ప్రోగేతువా ?

       ఆకురాతి మాట అణు బరాట !!

105.           సైన్సు చేయు మేలు – జగమెరింగిన నాడు

     మతములన్ని చచ్చి – చితికి చేరు

     నింగి సూర్యుడెగయ – నిలచునా చీకటుల్ ?

       ఆకురాతి మాట అణు బరాట !!

సమసమాజం కావాలా ?

106.           రైతు కూలి శ్రమను – రంజు గాదోచుకొని

     ధనికులెదుగుచున్న – ధరణి మీద

     సమ సమాజ బాట – భ్రమలమూటేనోయి

       ఆకురాతి మాట అణు బరాట !!

107.           తరతరాలనాడు తస్కరించిన భూము

     లెంచి శ్రామికులకు – పంచువరకు

     ఆకటి మరణాలు – అదుపు కొచ్చుట కల్ల

       ఆకురాతి మాట అణు బరాట !!

108.           వర్గ ఉద్యమాలు – వంచవలనే గాని

     బ్రతిమలాట కాస్తి – పంచబోరు

     రక్కకుంటె చెరకు – చక్కెర రాల్చునా ?

       ఆకురాతి మాట అణు బరాట !!

109.           ఆకలి పొలికేక – లాప కల్గే కిటుకు

     కార్లమార్క్సు లెనిను – గార్ల కెరుక

       కొయ్యవంకలన్ని – పొయ్యికే అవగతం

       ఆకురాతి మాట అణు బరాట !!

110.           కార్లమార్క్సు లెనిను – ఘటికులౌ ఏంగిల్స్

     బుర్రలందు పుట్టి – పుంజుకున్న

     సోషలిజమె సకల – దోషాల కౌషదం

     ఆకురాతి మాట అణు బరాట !!

111.           ఆకలి పెనుమంట – లార్ప కల్గిననాడె

     మూఢ మతములన్ని – ముసుగుతన్ను

     సమ సమాజమునకు – సరి బాటలేర్పడున్

     ఆకురాతి మాట అణు బరాట !!

112.           వరస విప్లవాలు – వర్ధిల్లినప్పుడే

     కలలు కనెడి – మిలకుదిగును

     మూఢ నమ్మకాల – పీడయున్ విరగడౌ

     ఆకురాతి మాట అణు బరాట !!

అక్రమ సెక్సు

సీ ||          నంద కృష్ణయ్య – మేనత్తకే మగడాయె

                     హరిశ్చంద్రుడు భార్యను – అమ్మివైచె

              గురుపత్నియగు తార – చెరపట్టె  చంద్రుణ్ణి

                     దక్షుండు సోదరికి – తాళి కట్టె

              సుగ్రీవు వదినెను – శోభన గది కీడ్చె

                     మరదల్నిగొని  వాలి – మలిన పరచె

              శత రూప, జాహ్నవి – సారస్వతీ, యిళ

                     తండ్రికే భార్యలై – తగలపడిరి

తే || గీ ||       అంధ యుగలముల నాటి – దుర్గంధమెల్ల

              గ్రంధములకెత్తి భక్తితో – రంగ రించి

              మూఢ విశ్వాసముల మూట – మూపు కెత్త

              మోక్షమని గార్ధభ శ్రేణి – మోయుచుండె

వేప గింజలు

 సీ ||             మౌని విశ్వా మిత్రు – మేనకన్ చెరపట్టి

                     బ్రహ్మర్షి పదవినే – బ్రష్టుపరిచె

              రుషి వశిష్టుండు – యరుంధతిన్ ముద్దాడి

                     రుషి కూటములకెల్ల – రోత పులిమె

              మౌని పరాశరు – మత్య గంధింగూడి

                     ఎలమి చేపల కంపు – పులుముకొనియె

              వేద వ్యాస మహర్షి – విధవల భోగించి

                     పండిత శ్రేణుల – పరువుతీసె

 ఆ || వె ||    శాపమీయగానె – చచ్చిరట , ఈ మునుల్

              వరము లీయ బ్రతికి – వచ్చిరంట

              వేపగింజలకును – తీపి తేనియలద్ది

              పుట్టి ముంచినారు – పూర్వకవులు

నేతి బీర

సీ ||           అనసూయ ఉడికించె – యినుప గుగ్గిళ్ళను

                     సావిత్రి యమునితో – జగడమాడె

              సుమతి శాపంబుతో – సూర్యుణ్ణి నిలవేసె

                     అగ్గిలో సీతమ్మ – నిగ్గుతేలె

              ద్రౌపదిని కాపాడ – దైవమే దిగివచ్చె

                     కుంతి దేవుళ్ళకే – సంతుకనియె

              ఆడదే లేకుండ – అయ్యప్ప జన్మించె

                     మగ పొందు లేకయే – మరియ కనియె

తే || గీ ||     నాటి వనితల మహిమకు – దీటుకొని

              నేటి మహిళను పతితగా – నిలుప వలెనె

              అతివలకు లేని గొప్పల – నంటగట్టి

              నేతి బీరను చేసిరి – నాతి బ్రతుకు    ||

              నాటు కుక్కలు

సీ ||                      ఆటలాడు కొనెడి – అతి చిన్న వయసునే

                     చిట్టి గొంతుకు తాళి – కట్టినారు

              పైసల కాసించి – పండు ముదుసలి కిచ్చి

                     చేసి కన్యల గొంతు – కోసినారు

              దుష్టు డైనా మగడు – దుర్మార్గుడైననూ

                     పడియుండ వలెనంచు – నుడివినారు

              కడకు చచ్చిన భర్త – కాయమ్ముతో సతిని

                     కాష్టమ్ములో వేసి – కాల్చినారు

ఆ || వె ||       విధవ రాళ్ళ చేసి – నుదిటి కుంకుమ దీయ

              మోము చూపలేని – ముదిత నిపుడు

              కాటు వేయ జూచు – నాటు కుక్కలు తప్ప

                   మనువు కొప్పు కొనెడి – ఘనులు కలరె ?